eta kitto! Euskara Elkartea revista : FIRIN FARAN

Firin faran

Deporrek antolatutako ‘Argazkilaritza maiatzean’, Iruņeako Natxo Zenborainek ezohiko performance-a eta happening-a egingo ditu bihar.

Argazkilaritza surrealistarekin batera, jendearen partehartzeak, poesiak eta dantza garaikideak euren txokoa izango dute.

NATXO ZENBORAIN, artista: “Jendearen irudimena probokatu nahiko nuke”

- Zertan datza Eibarrera ekarriko duzun emankizuna?
Eibarko Klub Deportiboko argazkilaritza saileko lagunek performance bat eskatu zidaten. Performance hori internet bidez muntatzea erabaki nuen, beraz, deialdi bat egin nuen argazkilaritza surrealistaren esparruan lanak jasotzeko. Deialdiak oso erantzun ona lortu zuen, eta azkenean 75 artista ezberdinen 160 lan inguru egongo dira ikusgai erakusketan. Artea herritarrei gerturatzea izango litzateke helburu nagusia. Horregatik erabaki nuen erakusketa Untzaga plazan muntatzea. Aukera paregabea izango da argazkiak kalean, bertatik bertara ikusteko, jendeari hainbeste ‘beldur’ ematen dien erakusketa-areto batean sartu gabe. Larunbatero Eibarko kaleetatik zehar egiten diren ibilalditxo horietako batean ikusteko erakusketa antolatuko dugu, kalean bertan.

- Argazkien autoreak ere bertan izango dira?
Ez, argazkilarien atalean ez da egilerik izango. Bigarren atal batean ordea, performancean, zuzeneko instalazioak muntatuko ditugu, eta hor bai, egileak bertan egongo dira. Artista batek nola egin eta nola sortzen duen ikusi ahal izango du ikusleak. 9 instalazio inguru egongo dira eta horien autoreak bertan izango dira, besteak beste Tony Grady, Luis Morea, Milton Duarte guatemalarra eta Koldo Agarraberes.

- Gainera, ikuslea elementu aktibo bilakatuko da, ezta?
Bai, Coliseo parean tailer bat antolatuko dugu. Helburua jendeari beldurra kentzea litzateke. Artazi batzuk hartu, koloretako paper-zatiak moztu eta kolarekin itsasteko gogoa duen edonori horixe egiteko aukera emango diogu, collage batean. Jendeak imajinazioa garatzea nahiko nuke, probokatu egin nahi ditut. Haurrengandik ikasi beharko genuke. Eurek ez daukate inolako ardurarik euren irudimena garatzeko, ez daukate beldur eszenikorik. Zirriborro bat egin duen haur bati ea zer marraztu duen galdetzen badiozu, lotsarik gabe erantzungo dizu zirriborro hura bere aita, edo ama, edota bere etxea dela. Berriz ere espiritu hori berreskuratu beharra dago, eta tailer horrekin horixe lortu nahiko nuke. Gainera, tailer horretan jendeak eginiko lan guztiak, geroxeago Untzaga plazan egongo dira ikusgai.

- Esparru ugari landuko dituzue beraz…
Eta ez hori bakarrik; poesiaz eta dantza garaikideaz disfrutatzeko aukera ere izango da, azken hau Carmen Larraz dantzariaren eskutik.

- Lehenengo aldia da gisa honetako performancea edo happening-a antolatzen duzula?
Ez, beste hainbat egin ditut azken urte hauetan. Iruņan, Gaztelu plazan emanaldi erraldoi bat antolatu nuen orain dela 10 urte; ondoren Florentzian eta Parisen ere antolatu izan ditut honelakoak.