EGUNKARIA


 Iruñeko Seminario pasabidea «suspertu» du Zenborainek

·«Performance» baten bidez, txoko horri bizitza eman dio



 

Iruñea «suspertu» eta jendea artera hurbildu. Horiexek dira Natxo Zenborain artistak bere azken «performance»aren bidez lortu nahi dituen bi helburu nagusiak. Hori posible egiteko, bere lan jardueran sortutako emaitzak agertzen ditu eta aste honetan hainbat ekimen ere bideratu ditu. Adibidez, bi kontzertu egingo dira, eta umeentzako tailerra ere antolatu du. 

Mikel LIZASO


IRUÑEA


Bere ohiko bizilekutik oso hurbil dagoen gune bat aukeratu du Natxo Zenborainek bere azken performancea garatzeko. Ekimen horren bidez, Iruñeko artistak udaletxeko plaza ondoan dagoen Seminario pasabideari itxura berria eman nahi dio. Atzo prentsaurrekoan agertu zuenez, txoko hori bakarrik ez, herri osoa suspertzen saiatuko da Zenborain hilabete honen 16ra bitartean. Horretarako, pasealeku horretan collage estiloko koloretako irudiak jarri ditu, eta, horretaz gain, gunea eskulturez hornitu du. Seminario pasealekuan erabili gabeko hainbat erakusleku daude eta horietan ere bere hainbat artelan agertuko ditu Zenborainek. Ordenagailu baten bidez, berriz, ehunka irudi agertuko ditu, «bertan behera utzita geratu diren eta bizitza propioa ematen saiatu naizen» objektuak alegia. Erakusketa horretan, bere jarduera artistikoan egindako lanak ikus daitezke, duela gutxi amaituriko beste batzuekin batera. Erakusketa hori mugikorra izango dela da ezaugarri nagusietako bat. Hau da, astean zehar artelan batzuk desagertu, eta, horien partez, beste batzuk jarriko ditu. Aste guztian, Iruñeko herriari bizitasun berezia emateko asmoz, perfomancea egingo den leku horretan bertan bi kontzertu eta haurrentzako tailer bat antolatu ditu Zenborainek. Azken ekimen horren inguruan agertu zuenez, umeek «amaigabeko sorkuntza ahalmena» dutela eta hori garatzen saiatuko dela adierazi zuen nafar artista horrek. Tailer horretan mugarik gabe jardun ahal izango dute haurrek.


Kontzertuei dagokienez, asteazkenean Doctor Robert taldeak hartuko du parte eta larunbatean Bur Abab musikarien txanda izango da. Aipatu kontzertu horiek arratsaldeko zortzietan izango dira. Atzo hasi eta aste barruan garatutako performance horretan gertatzen dena munduan zehar agertzea nahi du Natxo Zenborainek, eta, hori posible egin ahal izateko, web-orri bat sortu du. Interneteko gune horretan, egun osoan gertatzen diren gauzak azalduko ditu eta irudiak ere agertuko dira. Iruñeari bizitasun pixka bat emateaz gain, Natxo Zenborainen asmo nagusia artea herri horretako biztanleei hurbiltzea da. «Gaur egun badirudi beldurra ematen diola jendeari erakusketa guneetara joatea. Badirudi dena ordaindu behar dela eta hori ez da horrela. Artea doakoa ere izan daiteke». Gai horrekin jarraituz, Zenborainek berak esan zuenez, «gune honetara etortzen denari bi irudi ikusteak hausnarketarako gogoa pizten badio, nahikoa dut».